Zur Verhaftung gesucht

D Damon-Pitt-Bande, bestehend us em Leadmah Fatt Damon und em Gitarrist Rad Pitt, veröffentlicht 2022 d Debüt-EP «Velopolizischte», es Bekennerschriibe über einsitigi Liebi, Wuet, Hass und em verständliche Wunsch, alles hinder sich z lah und am Bahnhof z verotte.

Im Jahr 2023 wird d Gruppe personell verstärkt. D Astrid Voll, de Günther Lauch und de Gin Diesel gönd in Untergrund. De SUFF-Apparat erreicht damit es neus (Alkohol-)Level: lüüter, wiiblicher und no weniger kompromissbereit. Us de Offensive-2023 gönd d Singles «Boomer», «Rot Und Wiis» und «Startrampe» hervor. Wobi «Startrampe» für es paar Jahr unentdeckt inere Aservatekammere ligge bliibt. «Boomer» isch e bissigi Abrechnig mit eusere Lieblingsgeneration. «Rot Und Wiis» isch e liideschaftlichi Solidaritätserklärig an FC Winterthur; und damit ah alli, wo sich freiwillig für es Läbe zwüsche Hoffnig, Enttüschig und Bier entschiede hend.

Endi 2023 wird de Gin Diesel bi me Polizeiihsatz erschosse. Zwei Jahr später, Endi 2025, wird d Astrid Voll bi de Vorbereitige für es Schallattentat verhaftet und in Isolationshaft verschleppt. Ihri Position am Bass übernimmt vo da ah de Guerrilja. Damit isch s aktuelle Kommando komplett: Fatt Damon am Mikrofon, Rad Pitt am Schlagzüg, Günther Lauch ade Gitarre und de Guerrilja am Bass.

Was SUFF produziert, isch kei subtili Hintergrundmusik und au kei kulturelli Dienstleistig für Apéro-Verahstaltige. Es sind kurzi, luuti Lagebericht us ere Stadt, wo gern so tuet, als hetti sie alles im Griff. D Botschafte werded mit verzerrte Gitarre, hektischem Schlagzüg und maximaler Dringlichkeit übermittelt. Ironie dient als Tarnig, Alkohol als Betriebsmittel und de schlechti Gschmack als strategische Vorteil.

SUFF liefert kei Lösige. SUFF stellt höchstens fest, dass es Problem existiert und pisst den an nächste Bullewage.

Uf de Bühni tritt s Kommando gschlosse zur Aktion ah. D Durchfüherig isch schnell, verschwitzt und nur begrenzt kontrollierbar. Zwüschedem Kommando und em Publikum gits kein Sicherheitsabstand. Jede Konzertabig wird zur konspirative Vollversammlig vo all dene, wo am nächschte Morge eigentlich öppis Wichtigs vorgha hend und trotzdem bis zum Schluss blibed.

SUFF verfolgt weder en «Fünfjahresplan» no es vernünftigs Karriereziel. S Kommando operiert situativ, chaotisch und unter erschwerte Bedingige. Solang irgendwo en Verstärker summt, es Bier zischt und öpper behauptet, Punk isch tot, beschtaht akuti Handligsnotwendigkeit. D Untergrund-Zelle bliibt mobil, d Strukture undurchsichtig und de Pegel konstant.

SUFF isch viellicht nöd das, was mir hend welle. Aber es isch das, was mir alli verdient hend.